heimavist við Fjölbrautaskóla Suðurlands.
Herra forseti. Hér spyr ég um Fjölbrautaskóla Suðurlands og skal hér með uppljóstrast að ég ber miklar taugar til þess skóla. Fyrir 30 árum, um þessar mundir, settist ég á skólabekk þar og lauk fjórum árum síðar stúdentsprófi þaðan. En mig langar samt að trúa því að mér væri hlýtt til þessa skóla hvort eð er vegna þess að í honum kemur saman margt af því besta við framhaldsskólakerfið okkar. Þetta er skóli sem er settur á laggirnar fyrir um 40 árum í samvinnu ríkis og sveitarfélaga um allt Suðurland, gríðarstórt landsvæði, í þeirri viðleitni að auðvelda ungu fólki að mennta sig í heimabyggð. Þetta tókst. Fólki varð auðveldara að halda sig heima fyrir og í dag er þetta öflugur skóli með næstum því 1.000 nemendur í dagskóla, sinnir iðnnámi af krafti, býður upp á listnám og hestabrautir fyrir utan allt bóknámið sem er þarna í boði líka. Hann hefur alltaf státað af mjög fjölbreyttum nemendahópi, m.a. vegna þess að þetta er skóli sem er skilgreindur landfræðilega, hann tekur við öllum nemendum á Suðurlandsundirlendinu hvernig svo sem þau standa. Þetta vil ég meina að herði beinin í skólum. Það er gott fyrir skóla að lenda ekki í, eins og sumir bóknámsskólarnir í Reykjavík, að velja úr ákveðna tegund af nemendahópum heldur þurfi að takast á við alla flóruna. Þannig byggjum við upp öflugt, fjölbreytt og betra skólasamfélag. Þegar ég byrjaði var t.d. nýhætt að kenna nemendum af Litla-Hrauni í skólastofum á Selfossi, það var búið að byggja lítinn kofa niður á Hrauni fyrir þennan nemendahóp en þetta sýnir breiddina sem til staðar er.
Eðli máls samkvæmt, vegna þess að samgöngur eru ekki alltaf upp á marga fiska, almenningssamgöngur sérstaklega, og það er um langan veg að fara á þessu svæði hefur heimavist alltaf verið mikilvægur þáttur í skólastarfinu. Lengst af var lítið mál að koma henni fyrir í húsnæði gistihúsa eða hótela á svæðinu meðan ferðaþjónustan var bara rétt yfir hásumarið. En svo fór samkeppnin um húsnæðið að harðna og upp úr aldamótum þá hætti heimavist að vera í boði. Það var síðan eftir dálitla eftirgangsmuni árið 2020 sem það náðist að koma henni aftur á en svo raknaði upp úr þeim samningum núna upp úr áramótum. (Forseti hringir.) Það náðist að framlengja um ár, ekki varanlega, ekki til langtíma og væntanlega verður varanleg lausn ekki fundin í samnýtingu á gistiheimilum eins og nú er. (Forseti hringir.) Þess vegna langar mig að spyrja ráðherra: Hvernig hyggst hann tryggja framtíð heimavistar í Fjölbrautaskóla Suðurlands?
